L’accent da la collecziun dal museum d’art dal Grischun è mess sin l’art svizzer che ha in connex cun il chantun Grischun, dapi in pèr onns er sin l’art contemporan internaziunal che ha in connex cun il chantun muntagnard. Da quai fa part la cuntrada da muntogna da medema maniera sco l’alternanza tranter emigraziun e turissem.
Las muntognas èn lieus dal mitus, ma er da la conquista. Cur ch’ils Englais èn viagiads tras l’Europa sin lur «grand tour», han els scuvert las Alps sco lieu spectacular per lur aventuras. L’identitad odierna dal territori alpin è caracterisada decisivamain da questa vista nà da dadora.

Sche artistas ed artists s’occupan da vistas, da panoramas, da topografias e da lieus specifics, influenzeschan ellas ed els nossas ideas davart cuntradas. En la preschentaziun da la collecziun TRANSVERSAL vegnan tematisads – ensemen cun ina selecziun d’emprests – differents aspects d’illustraziuns da cuntradas.

Cun ovras tranter auter da Giro Annen, Guido Baselgia, Otto Dix, Gerber/Bardill, Giovanni ed Alberto Giacometti, Michel Grillet, Ferdinand Hodler, Monica Ursina Jäger, Heiner Kielholz, Ernst Ludwig Kirchner, Anne Loch, Jules Spinatsch, Jürg Stäuble, Albert Steiner.

En il context ed en il dialog cun questa exposiziun ha lieu venderdi e sonda, ils 8 ed ils 9 da november 2019, in simposi public da dus dis cun expertas ed experts da differentas disciplinas che sa deditgeschan al tema da la cuntrada. Il program detaglià suonda.